Sunday, February 17, 2013

പറയാതെ പോയ കപോതങ്ങളെ...


ഇനിയും വസന്തങ്ങള്‍ ഇതളണിഞ്ഞെത്തുമോ
പറയാതെ പോയ കപോതങ്ങളെ?
ഇതുവഴി എത്തുമോ ശ്യാമ മേഘങ്ങളേ 
പകലിന്റെ വറുതിയില്‍ പെയ്തിറങ്ങാന്‍ ?
ഒരു വേള നീ പോയ വഴിയിലൂടെത്തുമോ 
പറയാതെ പോയ കപോതങ്ങളെ?
ഇതു വഴി എത്തുമോ തെന്നലേ നീ എന്റെ 
പകലിന്നശാന്തിയില്‍ ഹിമ കണമായ്?
പറയുമോ നീ പോയ വഴികളി ലിത്തിരി 
കനിവിന്‍ കടമ്പുകള്‍ പൂത്തി രുന്നോ?
അകതാരിലായിരം കനലിന്റെ നാളങ്ങ-
ളറുതിയില്ലാതെ എരിഞ്ഞിടുമ്പോള്‍ 
ഒരു രാത്രിമഴയുടെ പദ നിസ്വനങ്ങളും 
കുളിരും കിനാക്കളും നീ തരില്ലേ?
ഇടി വീണൊരശ്വദ്ധ ശിഖര പഥങ്ങളില്‍ 
ചുടു നീഡമണയുവാന്‍ നീ വരുമോ?
ചിറകു കരിഞ്ഞൊരീ പക്ഷിതന്‍ നീഡത്തി-
ലിനിയും പിറക്കുമോ സാമ ഗാനം?
നിണമണി ഞ്ഞെത്തുന്ന പഥികന്റെ നോവിലേ-
ക്കൊരു മഞ്ഞു തുള്ളിയായ് നീ വരില്ലേ?
കനിവിന്‍ പയോധര മിനിയും ചുരത്തുമൊ 
രണ നിണം വാര്‍ന്നു തപിച്ച മണ്ണില്‍?
ഇനിയും പിറക്കാത്ത ഉണ്ണികളേ നിങ്ങ-
ളറിയുമോ പക്ഷിതന്‍ വേദനകള്‍?
അരുതേ പിറക്കല്ലേ ഗഗന മുപേക്ഷിച്ച 
പറവകളായി പിറക്കരുതെ!
--------------
(21.07.2012)