Monday, December 21, 2015

മതം മടുക്കുമ്പോൾ


അതു നീ ആണെന്ന് അറിയാൻ കഴിയാതെ വരുമ്പോൾ
പകൽ വെളിച്ചത്തിലേക്ക് ഇറങ്ങി ചെല്ലുക;
അവിടെ ഒരു സൂര്യനായി നീ എരിയുന്നുണ്ടാവും.

നീ അതു തന്നെ എന്ന് ഇനിയും അറിഞ്ഞില്ലെങ്കിൽ
നദിയോരത്തേക്കു പോവുക;
അവിടെ ഒരായിരം പരൽ മീനിനൊപ്പം
നീ കൂത്താടുന്നുണ്ടായിരിക്കും.

നിന്നെ പ്പോലെ അയൽക്കാരനെ സ്നേഹിക്കാൻ കഴിയാതെ വരുമ്പോൾ
അറവു ശാലയുടെ പടി കടന്നു ചെല്ലുക;
കാരുണ്യത്തിനായി ദാഹിക്കുന്ന നിന്നെ
അവിടെ കാണേണ്ടി വരും.

ആചാരങ്ങൾ നിന്നെ ബന്ധനസ്ഥ നാക്കുമ്പോൾ
പർവതങ്ങളുടെ ഉയരങ്ങൾ തേടുക;
അവിടെ ശുദ്ധ സ്വാതന്ത്ര്യത്തിൽ നിനക്കു വിലയം പ്രാപിക്കാം.

ഇല്ലാത്ത സ്വർഗം നിന്നെ ഇനിയും പ്രലോഭിപ്പിക്കുമ്പോൾ 
മണ്ണിരയുടെ മാളത്തിലേക്ക് ഇഴഞ്ഞു ചെല്ലുക;
പാതാളത്തിലെ സ്വർഗത്തിൽ നിനക്കും ഒരു രാത്രി കഴിയാം.

കുരുടനായ പുരോഹിതൻ നിൻറെ പണത്തെ അമിതമായി സ്നേഹിക്കുമ്പോൾ
വൻ മരങ്ങൾക്ക് ചോട്ടിലൂടെ സാവധാനം നടക്കുക;
കൊഴിഞ്ഞു വീഴുന്ന ഇലകൾ നിനക്കു മംഗളം അരുളുന്നുണ്ടാവും.

നവഗ്രഹങ്ങളും നക്ഷത്രങ്ങളും നിന്നെ തോൽപ്പിക്കുമ്പോൾ
നിലാവിലേക്ക് ഇറങ്ങിപ്പോവുക;
നീല കിരണങ്ങളിൽ നിനക്കൊരു പാട്ടായി അലിഞ്ഞു ചേരാം.

പുണ്യ പാപങ്ങളുടെ കുമ്പസാരക്കൂടുകൾ മാടി വിളിക്കുമ്പോൾ
മഴയിലേക്ക്‌ ഇറങ്ങിപ്പോവുക;
പ്രകൃതിയുടെ കണ്ണീരിൽ നീ വിശുദ്ധനായിത്തീരും.

മതം മടുക്കുമ്പോൾ സോദരാ
കവിതയിലേക്ക് നീ ഇറങ്ങി വരിക;
അവിടെ നീ ദൈവം മാത്രമായിരിക്കും.



2 comments:

  1. മതം മടുക്കുമ്പോൾ സോദരാ
    കവിതയിലേക്ക് നീ ഇറങ്ങി വരിക;
    അവിടെ നീ ദൈവം മാത്രമായിരിക്കും.

    ഇല്ലാത്ത സ്വർഗം നിന്നെ ഇനിയും പ്രലോഭിപ്പിക്കുമ്പോൾ
    മണ്ണിരയുടെ മാളത്തിലേക്ക് ഇഴഞ്ഞു ചെല്ലുക;
    പാതാളത്തിലെ സ്വർഗത്തിൽ നിനക്കും ഒരു രാത്രി കഴിയാം.

    കുരുടനായ പുരോഹിതൻ നിൻറെ പണത്തെ അമിതമായി സ്നേഹിക്കുമ്പോൾ
    വൻ മരങ്ങൾക്ക് ചോട്ടിലൂടെ സാവധാനം നടക്കുക;
    കൊഴിഞ്ഞു വീഴുന്ന ഇലകൾ നിനക്കു മംഗളം അരുളുന്നുണ്ടാവും.

    നവഗ്രഹങ്ങളും നക്ഷത്രങ്ങളും നിന്നെ തോൽപ്പിക്കുമ്പോൾ
    നിലാവിലേക്ക് ഇറങ്ങിപ്പോവുക;
    നീല കിരണങ്ങളിൽ നിനക്കൊരു പാട്ടായി അലിഞ്ഞു ചേരാം.

    പുണ്യ പാപങ്ങളുടെ കുമ്പസാരക്കൂടുകൾ മാടി വിളിക്കുമ്പോൾ
    മഴയിലേക്ക്‌ ഇറങ്ങിപ്പോവുക;
    പ്രകൃതിയുടെ കണ്ണീരിൽ നീ വിശുദ്ധനായിത്തീരും.

    മതം മടുക്കുമ്പോൾ സോദരാ
    കവിതയിലേക്ക് നീ ഇറങ്ങി വരിക;
    അവിടെ നീ ദൈവം മാത്രമായിരിക്കും.


    ശരിക്കും ഒരു സാക്ഷൽ കവിത
    അഭിനന്ദനങ്ങൾ ...പ്രിയൻ ഭായ്

    ReplyDelete
  2. ജീവിക്കാൻ യാതൊരു ആവശ്യവുമില്ലാത്ത ഒന്നാണു മതം എന്നാണെന്റെ മതം

    ReplyDelete