നിഗൂഢം

എവിടെ ഒളിപ്പിച്ചിരുന്നു നിൻ രാഗാർദ്ര
വിബുധ താരങ്ങളെ കാമ്യനിശീഥിനി!
ചിറകുരുമ്മിപ്പോകുമീഘനവേണിക്കു
പിറകിലോ, ചാരു ശശാങ്കബിംബത്തിലോ?

എവിടെയാണെങ്കിലും പുഞ്ചിരിപ്പാലൊളി
വിതറിയുഡുക്കൾ  വിരിഞ്ഞിടുമ്പോൾ   
തരളമീ മാനസത്തോണി തുഴഞ്ഞിന്ദ്ര
നഭസിന്റെ തീരത്തണഞ്ഞിടും ഞാൻ.

കരപരിലാളന സുഖദ സൗഗന്ധികം
വിടരുന്ന വിൺമലർവാടികയിൽ
ചമയമഴിച്ചനുപല്ലവി പാടിയീ
കടവിലെത്തു, കാത്തിരിക്കുന്നു ഞാൻ.

--------

14.04.2021